Tamil Entrepreneurs

வாரம் ரூ.93,000… `யுனிவர் காயின்' நிதி மோசடி.. ஓசூர் அலுவலகத்துக்கு சீல்!


அடுத்தடுத்து புதிது புதிதாக நிதி மோசடிகள் அம்பலமாகி அதிர்ச்சியை ஏற்படுத்திக்கொண்டே இருக்கின்றன. ஏற்கெனவே பரபரப்பை ஏற்படுத்தி ஆருத்ரா கோல்ட் நிறுவன மோசடி, ஐ.எஃப்.எஸ் மோசடி, தொழுதூர் ஜி.எஸ்.டி.எல் மோசடி வரிசையில் இப்போது அடுத்ததாக புதிய மோசடி கிருஷ்ணகிரியில் அம்பலமாகி இருக்கிறது.

ரூ.7.7 லட்சம் டெபாசிட் செய்தால், ஒவ்வொரு வாரமும் ரூ.93,000 வருமானம் கிடைக்கும் என்று ஒரு நிறுவனம் மக்களை ஏமாற்றி பணத்தை திரட்டி மோசடியில் ஈடுபட்டது கண்டு பிடிக்கப்பட்டுள்ளது.

யுனிவர் காயின் அருண்குமார்

கிருஷ்ணகிரியில் அருண்குமார் என்பவர் யுனிவர் காயின் என்கிற நிறுவனத்தை நடத்திவந்தார். டிஜிட்டல் காயின் வர்த்தகம் செய்யும் இந்த நிறுவனத்தில் ரூ.7.7 லட்சம் டெபாசிட் செய்தால், வாராந்தோறும் ரூ.93,000 வருமானம் கிடைக்கும் என்று ஆசை வார்த்தைக் கூறி பல ஆயிரம் பேரிடம் பல கோடி ரூபாய் மோசடியில் ஈடுபட்டிருக்கிறது.

குறிப்பாக, ராணுவ வீரர்களை இந்த நிறுவனம் குறிவைத்து பணத்தை வாங்கி இருப்பதாகக் கூறப்படுகிறது. இந்த யுனிவர் காயின் தொடர்பான விளம்பரங்கள் கவர்ச்சிகரமாக இருப்பதைப் பார்த்து பேராசைப்பட்டு இந்த நிறுவனத்தில் நந்தகுமார், சங்கர், ஞானசேகர், சீனிவாசன், பிரகாஷ், வேலன் ஆகியோர் இந்த நிறுவனத்தில் முகவர்களாகச் சேர்ந்துள்ளனர்.

இவர்கள் அனைவரும் முன்னாள் ராணுவ வீரர்கள் என்பதும் குறிப்பிடத்தக்கது. அதிகமான நபர்களை இந்தத் திட்டத்தில் சேர்த்தால், பலமான இன்சென்டிவ், வெளிநாடு சுற்றுலா, விலை உயர்ந்த பரிசுகள் என கொடுத்து மூளைச் சலவை செய்துள்ளனர். இவர்களும் ஆசைப்பட்டு தங்களுக்குத் தெரிந்தவர்கள், உறவினர், நண்பர்கள் எனப் பலரை இதில் சேர்த்துள்ளனர்.

ஓசூர் அலுவலகம்

வழக்கமான மோசடித் திட்டங்களைப் போலவே, இதிலும் சில வாரங்கள் மட்டும் சொன்னபடி பணத்தைக் கொடுத்துள்ளனர். அதன்பிறகு தொடர்ந்து பணத்தைக் கொடுக்காமல் ஏமாற்றி உள்ளனர். இந்த யுனிவர் காயின் மோசடியில் ஏறக்குறைய ரூ.500 கோடி முதல் ரூ.1,000 கோடி வரை மக்கள் ஏமாற்றப்பட்டிருக்கலாம் என்று தெரிவிக்கிறார்கள்.

இந்த நிறுவனத்தின் மீது எழுந்த புகார்களை அடுத்து தருமபுரி மாவட்ட பொருளாதாரக் குற்றப் பிரிவினர் இந்த நிறுவனத்துக்குச் சம்பந்தப்பட்டவர்களின் அலுவலகம் வீடுகளில் சோதனை நடத்தினர். இதை அடுத்து ஓசூர் அலுவலகத்துக்கு சீல் வைக்கப்பட்டுள்ளது. அருண்குமார் உள்ளிட்ட ஆறு பேர் மீது நம்பிக்கை மோசடி உள்ளிட்ட பிரிவுகளில் போலீஸார் வழக்குப்பதிவு செய்துள்ளனர்.

இந்த நிறுவனத்தின் அலுவலகம், முகவர்களின் வீடுகள் போன்றவற்றில் நடத்திய சோதனையில் பல லட்சம் மதிப்புள்ள தங்க ஆபரணங்கள், சொத்து ஆவணங்கள், ரொக்கப் பணம் போன்றவற்றைப் பறிமுதல் செய்துள்ளனர். இந்த விவகாரத்தில் இதுவரை பிரகாஷ், சீனிவாசன் உள்ளிட்ட இருவர் கைது செய்யப்பட்டுள்ளனர். போலீஸ் விசாரணையில் அடுத்தடுத்து இந்த விவகாரம் குறித்த தகவல் வெளிவரும்.

நிதி நிறுவன மோசடி

இதுபோன்ற மோசடி கும்பல்கள் பல இடங்களில் பல பெயர்களில் செயல்பட்டு வருகின்றன. அவை எல்லாமே அதிக லாபம் தருவதாக ஆசை காட்டி, மக்களின் பணத்தைக் கொள்ளை அடிப்பதையே நோக்கமாக கொண்டு செயல்பட்டு வருகின்றன. அதிக லாபத்த்துக்கு ஆசைப்பட்டு, இந்த மோசடி நிறுவனங்களில் பணத்தைக் கட்டினால், அந்தப் பணம் திரும்ப வராது என்பதை மக்கள் புரிந்துகொண்டு, இது மாதிரியான திட்டங்களில் இருந்து விலகி நிற்க வேண்டும் என்பதை உணர வேண்டும்.



Source link

Leave a Reply

Your email address will not be published.